ភ្នំពេញ ៖ ក្រសួងកសិកម្ម រុក្ខាប្រមាញ់ និងនេសាទ បានរាយការណ៍ឲ្យដឹងថា កម្ពុជាទទួលបានកូនផ្សោតកើតថ្មី ១ក្បាល ទៀតហើយ ដែលទើបនឹងកើត នៅអន្លងផ្សោតកាំពី ខេត្តក្រចេះ ។ សូមជម្រាបជូនដែរថា នេះជាកូនផ្សោតកើតថ្មីទី៨ហើយ ដែលត្រូវបានមន្ត្រីជំនាញបានកត់ត្រាក្នុងឆ្នាំ២០២៣នេះ ។
យោងតាមការផ្សាយក្នុងទំព័រហ្វេសប៊ុកផ្លូវការរបស់ក្រសួងកសិកម្ម រុក្ខាប្រម៉ាញ់ និងនេសាទ នៅល្ងាចថ្ងៃទី០៤ វិច្ឆិកា ២០២៣ នេះ បានឲ្យដឹងទៀតថា កូនផ្សោតដែលទើបនឹងកើតថ្មីនេះ ទើបមានអាយុប្រមាណ២ថ្ងៃប៉ុណ្ណោះ ។ កូនផ្សោតមួយក្បាលនេះ ត្រូវបានគេប្រទះឃើញនៅវេលាម៉ោង១៣ និង៥០នាទីរសៀលថ្ងៃទី៤ ខែវិច្ឆិកា ឆ្នាំ២០២៣នេះតែម្តង។
តាមរយៈការផ្ដល់ដំណឹងពីអ្នករត់ទូកទេសចរណ៍នៅអន្លង់ផ្សោតកាំពី ក្រុមការងាររបស់រដ្ឋបាលជលផល និងអង្គការ WWF បានចុះទីដល់ទីតាំង និងថតបានរូបថតកូនផ្សោតនេះ ដែលកំពុងហែលលេងក្នុងក្រុមហ្វូងសត្វផ្សោតប្រមាណ ៦ក្បាល ក្នុងអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ ដែលមានចំណុចនិយាមកា ៤៨P: ០៦១០៤០៥ និង UTM: ១៣៩០៨៧៧។
ក្រសួងកសិកម្មបានឲ្យដឹងទៀតថា បើតាមការអង្កេតជាក់ស្តែងរយៈពេលប្រមាណ ២ម៉ោង ក្រុមការងាររដ្ឋបាលជលផល និងអង្គការ WWF សង្កេតឃើញថា ពុំមានសកម្មភាពបំពានណាមួយពីសំណាក់សត្វផ្សោតធំមកលើកូនផ្សោតទើបនឹងកើតថ្មីនោះទេ ៕
