នាយកដ្ឋានប្រយុទ្ធនឹងជំងឺឆ្លង CDC បានរកឃើញកុមារីម្នាក់ អាយុ ៧ឆ្នាំ បានឆ្លងជំងឺ ហ្ស៊ីកា ដែលមានអាស័យដ្ឋានរស់នៅភូមិពពេជ ឃុំចុងដូង ស្រុកបារាយណ៍ ខេត្តកំពង់ធំ។
យោងតាមការផ្សាយតាមហ្វេសប៊ុកផេកផ្លូវការនៃនាយកដ្ឋានប្រយុទ្ធនឹងជំងឺឆ្លង CDC បានឲ្យដឹងថា កុមារីរូបនោះ ត្រូវបានបញ្ជូនទៅសម្រាកនៅមន្ទីរពេទ្យបង្អែកបារាយណ៍-សន្ទុក ផ្នែកសង្គ្រោះបន្ទាន់កុមារ កាលពីថ្ងៃទី១៨ ខែកញ្ញា ឆ្នាំ២០២៣ វេលាម៉ោង ១៨ម៉២៥នាទី ។
នាយកដ្ឋានប្រយុទ្ធនឹងជំងឺឆ្លង CDC បានឲ្យដឹងទៀតថា រោគសញ្ញាដំបូងនៃកុមារីរូបនោះ គឺនៅថ្ងៃទី១៩ ខែកញ្ញា ឆ្នាំ២០២៣ នាងមានអាការៈ ក្តៅខ្លួនខ្លាំង មានក្អួត និងរាក ។ បន្ទាប់ពីគ្រូពេទ្យបានព្យា បាលកុមារីបានធូរស្បើយលែងមានក្អួតទៀត ហើយគ្រូពេទ្យបានធ្វើតេស្តរហ័សគ្រុនឈាម តែលទ្ធផលអវិជ្ជមាន។
មួយថ្ងៃបន្ទាប់ គឺនៅថ្ងៃទី១៩ ខែកញ្ញា ឆ្នាំ២០២៣ ក្រុមគ្រួពេទ្យបានយកវត្ថុវិភាគផ្ញើរទៅវិទ្យាស្ថានប៉ាស្ទ័រ និងនៅថ្ងៃទី២១ ខែកញ្ញា ឆ្នាំ២០២៣ លទ្ធផលបានបង្ហាញថា កុមារីរូបនោះមានវិជ្ជមានជំងឺហ្សីកា ។
បើតាមការឱ្យដឹងពីនាយកដ្ឋានប្រយុទ្ធនឹងជំងឺឆ្លង CDC ជំងឺហ្ស៊ីកា (Zika Virus), មេរោគ Zika ត្រូវបានចម្លងជាចម្បងដោយមូសប្រភេទ Aedes ដែលខាំភាគច្រើននៅពេលថ្ងៃ។ មនុស្សភាគច្រើនដែលមានការឆ្លងមេរោគ Zika មិនមានរោគសញ្ញាទេ។ អ្នកដែលមានរោគសញ្ញាជាធម្មតារួមមានកន្ទួល គ្រុនក្តៅ រលាកសន្លាក់ ឈឺសាច់ដុំ និងសន្លាក់ ឈឺក្បាល និងឈឺក្បាលដែលមានរយៈពេល 2-7 ថ្ងៃ។
ការឆ្លងមេរោគ Zika អំឡុងពេលមានផ្ទៃពោះអាចបណ្តាលឱ្យទារកកើតមកមាន microcephaly (ទារកក្បាលតូច) និងភាពមិនប្រក្រតីពីកំណើតផ្សេងទៀត ក៏ដូចជាការកើតមិនគ្រប់ខែ និងការរលូតកូន។
បច្ចុប្បន្នមន្រ្តីក្រុមឆ្លើយតបបន្ទាន់គ្រប់ជាន់ថ្នាក់ និងមន្ត្រីជំនាញពីនាយកដ្ឋានប្រយុទ្ធនឹងជំងឺឆ្លង កំពុងចុះទប់ស្កាត់ការរីករាលដាល និងអង្គេតស្រាវជ្រាវរកប្រភពចម្លង ដើម្បីទប់ស្កាត់ឱ្យមានប្រសិទ្ធភាពខ្ពស់ ។
នាយកដ្ឋានប្រយុទ្ធនឹងជំងឺឆ្លង CDC បានអំពាវនាវដល់ប្រជាពលរដ្ឋទាំងអស់បង្ការកុំឱ្យមូសខាំ ជាពិសេសកុមារតូច នងស្រ្តីមានផ្ទៃពោះ និងធ្វើអនាម័យជុំវិញផ្ទះ ក្នុងករណីមានរោគសញ្ញាដូចខាងលើ សូមអញ្ជើញទៅពិគ្រោះជំងឺនៅមណ្ឌលសុខភាព និងមន្ទីរពេទ្យ និងទាក់ទងសាកសួរព័ត៌មានបន្ថែមតាមរយៈលេខ ១១៥ ៕
