ក្រសាំងទាប ជារុក្ខជាតិប្រភេទស្មៅ និងជាដំណាំមួយប្រភេទដែលប្រជាពលរដ្ឋខ្មែរនិយមដាំនៅជុំវិញផ្ទះ ជាពិសេសនៅកន្លែងដីសើម និងត្រជាក់ ដោយសារតែវាងាយស្រួលដាំ ឆាប់បានផល និងអាចទទួលបានផលប្រយោជន៍ច្រើន ទាំងផ្នែកចំណីអាហារ និងអាចធ្វើជាឱសថផងដែរ។
យោងតាមក្រសួងបរិស្ថាន បន្លែក្រសាំងទាប Peper elder, shining bush plant ដែលមានឈ្មោះវិទ្យាសាស្ត្រ Peperomia pellucida (L.) Kunth ក៏អាចដុះដោយខ្លួនឯងផងដែរដោយមិនបាច់ដាំ ដូចជាដុះតាមគុម្ពផ្កា ក្នុងសួនបន្លែ និងតាមកៀនកោះដែលសើមត្រជាក់ដូចជាម្ដុំជិតពាងទឹក នៅទីជនបទជាដើម ។ ក្រសាំងទាបនេះមានកម្ពស់ចាប់ពី១០ស.ម ទៅ ៣០ស.ម មានតួដើមដំបូងដុះត្រង់ទៅលើ រួចកោងចុះក្រោមដល់ដី ហើយចាក់ឫសតាមថ្នាំង មានលក្ខណៈស្រួយ មានពណ៌សថ្លាបៀមជាតិទឹក និងមានរសជាតិប្រហាក់ប្រហែលនឹងត្រកួន ។ ចំណែកស្លឹករបស់រុក្ខជាតិនេះ ដុះវិលគូទខ្យង មានពណ៌បៃតងភ្លឺ មានរាងមូលទ្រវែង ទ្រនុងរាងកង្ហារ និងមានទង ។ ក្រសាំងទាបមានផ្កាទ្វេភេទ គ្មានទង គ្មានត្របកផ្កា គ្មានស្រទាប់ផ្កា តែមានកេសរឈ្មោល២ កេសរញី១ ។ ដោយឡែក ផ្លែជាឌ្រុប (drupe) មានរាងជាដុំមូល ហើយមានគ្រាប់តែ១ ដែលមានរសជាតិហឹរតិចៗ ។
យោងតាមក្រសួងបរិស្ថានដដែលបានឲ្យដឹងទៀតថា ពាក់ព័ន្ធនឹងលក្ខណៈជីវសាស្ត្រវិញ ក្រសាំងទាបអាចលូតលាស់ទៅជាសំណាបដុះពន្លកក្នុងរយៈពេលប្រមាណ១៥ថ្ងៃ ក្រោយពីការបណ្តុះគ្រាប់ ហើយអាចលូតលាស់រហ័ស ជាផ្នែកមួយដែលអំណោយផលដល់អ្នកដាំ ពោលគឺអាចទទួលបានផលលឿន។ បន្ថែមលើនេះ ស្លឹករបស់ក្រសាំងទាប មានផ្ទុកជាតិប្រេងសំខាន់ ឬហៅថា (essential oil) ច្រើន។
បន្លែប្រភេទនេះ ប្រជាពលរដ្ឋខ្មែរនិយមប្រើប្រាស់ដើមខ្ចីៗ និងស្លឹកជារបោយផ្ទាប់ ឬទ្រាប់សាច់ឆា ឆាសាច់គោ ចំណែកឯដើម និងស្លឹកចាស់ៗ ក៏អាចធ្វើជាចំណីគោ ក្របី បានផងដែរ។
ក្រៅពីអាចធ្វើម្ហូបអាហារសម្រាប់ទទួលទាន ក្រសាំងទាបក៏ត្រូវបានក្រុមអ្នកស្រាវជ្រាវបានរកឃើញថា ថែមទាំងមានអត្ថប្រយោជន៍ច្រើន អាចប្រើជាឱសថធម្មជាតិដ៏មានប្រសិទ្ធភាពខ្ពស់ចំពោះសុខភាព អាចព្យាបាលជំងឺផ្សេង និងសម្រស់ផងដែរ ក៏ព្រោះតែក្រសាំងទាបមានផ្ទុកជាតិ វីតាមីន C និងបេតាការ៉ូទីនខ្ពស់ ។ ស្លឹករបស់រុក្ខជាតិក្រសាំងទាប មានសារធាតុ TRINIDATE ដែលច្រើនយកមកប្រើជាថ្នាំត្រជាក់ ។ នៅប្រទេសមួយចំនួន គេថែមទាំងយកក្រសាំងទាប ទៅប្រើសម្រាប់ទម្លាក់ជាតិខ្លាញ់ក្នុងឈាម Cholesterol និងជួយកាត់បន្ថយអាស៊ីតអ៊ុយរិច នៅក្នុងឈាមផងដែរ ។
ខាងក្រោមគឺជាអត្ថប្រយោជន៍ ជាច្រើនទាបរបស់ក្រសាំងទាបសម្រាប់ការព្យាបាលជម្ងឺផ្សេងៗ៖
ស្លឹកក្រសាំងទាប ត្រូវបានគេយកមកបុកពូតយកទឹកពិសា ដែលជួយកែបញ្ហាជាច្រើនមុខដូចជា បំបាត់អាការៈឈឺក្បាល, បំបាត់ជំងឺភ្នែកដុះកន្ទុយថ្លែន Glaucoma, បន្ថយកម្ដៅ, កែបញ្ហារលាក, បំបាត់អាការចុកពោះ, ជំនួយបេះដូង, ជួយបញ្ចុះទឹកនោម នាំឲ្យបត់ជើងតូចស្រួល, ទប់ស្កាត់ពពួកបាក់តេរីដែលធ្វើឲ្យកើតមុន ពិស រើម ឫបូសជាដើម ។ បំបាត់អាការឈឺសន្លាក់ ឆ្អឹង យ៉ាងមានប្រសិទ្ធភាព, ប្រឆាំងរ៉ាឌីកាល់សេរី ទប់ស្កាត់ជម្ងឺមហារីក ដូចជាមហារីកសុដន់ជាដើម ។ ចំពោះការព្យាបាលជំងឺរើម ត្រូវបានអ្នកជំនាញបានបញ្ជាក់ថា គេអាចយកស្លឹកក្រសាំងទាបមកបុកជាមួយល្មៀត និងម្សៅអង្ករ រួចយកទៅបិទលើកន្លែងដែលមានរើម រួចទុកចោលមួយយប់ ) ។
មិនត្រឹមតែជួយទប់ស្កាត់ ការពារ និងបង្ការនូវបញ្ហាជាច្រើនទាំងនោះប៉ុណ្ណោះទេ ស្លឹកក្រសាំងទាប ថែមទាំងអាចជួយបំប៉នស្បែកមុខឲ្យភ្លឺរលោងថែមទៀតផង តាមរយៈការយកស្លឹកដាំទឹក ទុកឲ្យត្រជាក់ រួចទើបយកមកលាងមុខ, ជួយបំបាត់សក់ជ្រុះ តាមរយៈការច្របាច់ស្លឹកយកមកកក់សក់ ដែលនឹងធ្វើឲ្យសក់ភ្លឺទន់រលោង ។
បើទោះជាយ៉ាងណាក៏ដោយ ការអនុវត្តតាមវិធីជាច្រើនដែលអាចទាញយកប្រយោជន៍ពីក្រសាំងទាបក៏ពិតមែន ប៉ុន្តែក៏ត្រូវបានអ្នកជំនាញព្រមានផងដែរថា រុក្ខជាតិនោះ គឺគ្រាន់ជាបន្លែសម្រាប់បរិភោគ ដែលមិនមែនជាថ្នាំសម្រាប់ព្យាបាលជំងឺឡើយ គ្រាន់តែវាមានគុណសម្បត្តិដល់ការថែរក្សាសុខភាព និងជំងឺប៉ុណ្ណោះ ដោយលោកអ្នកមិនគួរអនុវត្តលើសកម្រិតនោះទេ ព្រោះវាក៏អាចបង្កឲ្យប៉ះពាល់ដល់សុខភាពផងដែរ ។ ហើយប្រសិនបើអ្នកមានការបារម្ភពីផលរំខានណាមួយ សូមពិភាក្សាជាមួយគ្រូពេទ្យ ឬគ្រូឱសថបុរាណ ៕
