ព្រះសីហនុ ៖ នាវាទេសចរណ៍ ១គ្រឿង ដែលបានដឹកភ្ញៀវទេសចរណ៍ចំរុះជាតិសាសន៍ចំនួនជិត ៩០០នាក់ បានចូលចតកំពង់ផែស្វយ័តក្រុងព្រះសីហនុ ដើម្បីមកទស្សនាកម្សាន្តប្រទេសកម្ពុជាចំនួន ២ថ្ងៃ ។ យោងតាមការឲ្យដឹងពីកំពង់ផែស្វយ័តក្រុងព្រះសីហនុបានឲ្យដឹងថា នាវាទេសចរណ៍ ឈ្មោះ Viking Orion សញ្ជាតិ Norway ដែលមានប្រវែងបណ្តោយ ២២៨,៣០ ម៉ែត្រ ប្រវែងទទឹង ២៨,៨០ម៉ែត្រ ជម្រៅ-៦,៦៥ម៉ែត្រ បានចូលចតកំពង់ផែស្វយ័តក្រុងព្រះសីហនុ នាវេលាម៉ោង ៧ព្រឹក ថ្ងៃទី៤ ខែវិច្ឆិកា ឆ្នាំ២០២៣ ។ នាវាទេសចរណ៍នេះ មាននាវិកសរុបចំនួន ៤៦៩នាក់ (ស្រី ៩៤នាក់) មាន ៥០សញ្ជាតិ និងមានភ្ញៀវទេសចរណ៍សរុបចំនួន ៨៦៨នាក់ (ស្រី ៤៥០នាក់) មាន ១៨សញ្ជាតិ។ ចំនួនសញ្ជាតិដែលមានភ្ញៀវច្រើនជាងគេ គឺសហរដ្ឋអាមេរិក (៦៦៧នាក់) កាណាដា (៦៣នាក់) និងអង់ គ្លេស (៤៣នាក់) ។
មុនចូលមកដល់កម្ពុជា នាវាទេសចរណ៍ Viking Orion ទើបនឹងចេញដំណើរមកពីប្រទេសវៀតណាម ។ បន្ទាប់ពីចាកចេញពីកម្ពុជា នាវានេះនឹងចាកចេញបន្តទៅប្រទេសថៃ នៅវេលាម៉ោង ២រសៀល នាថ្ងៃទី៥ ខែវិច្ឆិកា ឆ្នាំ២០២៣ ៕
