ពោធិ៍សាត់: អភិបាលខេត្តពោធិ៍សាត់ ទុកពេលមួយសប្តាហ៍ឲ្យមន្ត្រីពាក់ព័ន្ធធ្វើការដោះស្រាយបញ្ហា ទឹកលិចលង់លំនៅឋានពលរដ្ឋ និងផ្ទៃដីកសិកម្មប្រមាណ ៥០ហិកតា ដែលមិនអាចបង្កបង្កើនផលអស់រយៈពេលជាង៣ឆ្នាំមកហើយ ស្ថិតនៅឃុំតាលោ ស្រុកតាលោកសែនជ័យ ។ ការដាក់បញ្ជាពីអភិបាល ខេត្តពោធិ៍សាត់ បានធ្វើឡើងបន្ទាប់ពីមានការសំណូមពរពីប្រជាពលរដ្ឋជិត៣០គ្រួសារ នៅក្នុងភូមិតាលោ ឃុំតាលោ ស្រុកតាលោសែនជ័យ និងក្នុងពេលដែលលោកបានអញ្ជើញចុះទៅពិនិត្យស្ថានភាពជាក់ស្តែងដល់មូល ដ្ឋាន នៅថ្ងៃទី២៦ កញ្ញា ២០២៣នេះ ។
ក្នុងដំណើររបស់លោកអភិបាលខេត្តនោះផងដែរ បានមានការចូលរួមអញ្ជើញអមដំណើរដោយមន្ត្រីមន្ទីរធនធានទឹកឧតុនិយមខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត រដ្ឋបាលស្រុកតាលោសែនជ័យ និងអាជ្ញាធរឃុំផងដែរ ។ប្រជាពលរដ្ឋដែលបានសំណូមពរឲ្យមានការដោះស្រាយចំពោះបញ្ហា ទឹកលិចចូលលំនៅដ្ឋាន និងរំខានដល់ការធ្វើកសិកម្មនោះ ពួកគាត់បានអះអាងថា គឺបណ្តាលមកពីការស្ថាបនាប្រឡាយស្ទាក់ផ្លូវទឹក។
លោក ខូយ រីដា ក្នុងឱកាសនោះបានមានប្រសាសន៍ថា ដោយពិនិត្យស្ថានភាពជាក់ស្តែងឃើញថា ផ្លូវទឹកតូច ទើបធ្វើឱ្យមានលិចលង់លំនៅឋាន និងដីស្រែចំការរបស់ប្រជាពលរដ្ឋ ។ ដោយមើលឃើញពី បញ្ហានេះហើយ លោកអភិបាលបានស្នើឱ្យមន្ទីរធនធានទឹក និងឧតុនិយមខេត្ត រួមជាមួយអាជ្ញាធរ ស្រុក ឃុំ ត្រូវប្រើប្រាស់គ្រប់មធ្យោបាយ ដើម្បីបើកផ្លូវទឹកឱ្យបានជ្រៅ និងធំទូលាយ ក្នុងបំណងបញ្ជៀសនូវរាល់ការលិចលង់ ដោយការអនុវត្តនេះ គឺទុកពេលឲ្យមួយសប្តាហ៍ត្រូវធ្វើឲ្យបានរួចរាល់ជាស្ថាពរ ។
លោកអភិបាលខេត្ត បានថ្លែងទៀតថា ចំពោះប្រឡាយមួយខ្សែដែលប្រជាពលរដ្ឋអះអាងថា បានស្ទាក់ផ្លូវទឹកនោះ គឺមន្ទីរជំនាញត្រូវធ្វើការសិក្សាឡើងវិញកុំឱ្យមានបញ្ហាកើតឡើងទៅថ្ងៃខាងមុខទៀត ហើយត្រូវធ្វើឱ្យចប់ និងទទួលបានលទ្ធផលទាំងអស់គ្នា។
លោក ខូយ រីដា ក៏បានសំណូមពរដល់ប្រជាពលរដ្ឋ ដែលមានការប៉ះពាល់ដីរបស់ខ្លួន សូមមេត្តាចូលរួមសហការបរិច្ចាគ ដើម្បីឱ្យក្រុមការងារអនុវត្តទៅកាន់ឆាប់រហ័ស និងទាន់ពេលវេលា។
លោកបានសំដែងក្តីសង្ឃឹម និងមានទំនុកចិត្តចំពោះមន្ទីរធនធានទឹក និងឧតុនិយមខេត្ត រដ្ឋបាលស្រុកតាលោសែនជ័យ អាជ្ញាធរឃុំ និងប្រជាពលរដ្ឋថា ពិតជាចូលរួមសហការក្នុងការបើកផ្លូវទឹក ក្នុងគោលបំណងបម្រើផលប្រយោជន៍រួមទាំងអស់គ្នា។
ប្រជាពលរដ្ឋដែលរងការលិចលង់ដោយសារស្ទះផ្លូវទឹក បានសំដែងការសាទរចំពោះចំណាត់ការរបស់ អភិបាលខេត្តពោធិ៍សាត់ លោក ខូយ រីដា និងដែលបានចុះមកដោះស្រាយដោយផ្ទាល់ក្នុងការបើកផ្លូវទឹកនេះឡើងវិញ បន្ទាប់ពីជួបការលំបាកអស់រយៈពេល៣ឆ្នាំ ដោយសារការលិចលង់មិនអាចបង្កបង្កើនផលនោះឡើយ៕
