ព្រះសីហនុ ៖ សម្តេចតេជោហ៊ុន សែន នាយករដ្ឋមន្រ្តី នៅល្ងាចមិញនេះ បានបង្ហាញរូបភាពបញ្ជាក់ពីសកម្មភាពលំហែកាយនៅខេត្តព្រះសីហនុ របស់សម្តេចជាច្រើនសន្លឹក បន្ទាប់ពីបំពេញការងារពីព្រឹកនៅរាជធានីភ្នំពេញរួចរាល់ ។ ការបង្ហាញរូបភាពនេះ បានធ្វើឡើងតាមរយៈហ្វេសប៊ុកផ្លូវការរបស់សម្តេច នៅល្ងាចថ្ងៃទី២១ ធ្នូ ២០២២នេះ ។ សម្តេចបានសរសេរនៅហ្វេសប៊ុកផ្ទាល់ខ្លួនសម្តេចថា «ព្រឹកប្រជុំ និងធ្វើការងារនៅភ្នំពេញ បាយថ្ងៃត្រង់ហើយ ពេលរសៀលធ្វើដំ ណើរតាមផ្លូវល្បឿនលឿនមកមុជទឹកសមុទ្រនៅក្រុងព្រះសីហនុ ដើម្បីស្អែកនេះចូលរួមសម្ភោធដាក់ឲ្យប្រើប្រាស់ផ្លូវមួយខ្សែទៀត»។
កម្ពុជាតាំងពីបើកឲ្យដំណើរផ្លូវល្បឿនលឿនភ្នំពេញ-ព្រះសីហនុ ដែលជាផ្លូវល្បឿនលឿនដំបូងបំផុតនៅកម្ពុជានោះមក ការធ្វើដំណើរពីរាជធានីភ្នំពេញ ទៅខេត្តព្រះសីហនុ ត្រូវចំណាយពេលវេលា ត្រឹមតែ ២ ទៅ៣ម៉ោងប៉ុណ្ណោះ កាត់បន្ថយពេលវេលានៃការធ្វើដំណើរបានយ៉ាច្រើន បើប្រៀបធៀបនឹងផ្លូវធម្មតា ។ ការធ្វើដំណើរតាមផ្លូវធម្មតាមក្នុងទិសដៅពីរាជធានីភ្នំពេញទៅខេត្តព្រះស៊ីហនុកន្លងមក គឺត្រូវចំណាយពេលយ៉ាងហោចពី៥ ទៅ ៦ម៉ោង ដែលមិនអាចសម្រួលដល់ការធ្វើកិច្ចការពីរឬច្រើន ក្នុងពេលតែមួយថ្ងៃបានឡើយ ប្រសិនមានករណីចាំបាច់នោះ៕
