បាត់ដំបង ៖ រដ្ឋបាលខេត្តបាត់ដំបង នឹងរៀបចំព្រឹត្តិការណ៍ពិព័រណ៍ម្ហូបអាហារខេត្តបាត់ដំបង ក្នុងឱកាសឆ្លងឆ្នាំសកលឆ្នាំ២០២២-២០២៣ខាងមុខនេះ ។ គំរោងនៃការរៀបចំព្រឹត្តិការណ៍ពិព័រណ៍ម្ហូបអាហារនេះ បានឲ្យដឹងនៅក្នុងកិច្ចប្រជុំមួយ ស្ដីពីការរៀបចំព្រឹត្តិការណ៍ពិព័រណ៍ម្ហូបអាហារខេត្តបាត់ដំបង ដែលបានអញ្ជើញដឹកនាំប្រជុំដោយអភិបាលខេត្តបាត់ដំបង លោក សុខ លូ កាលពីល្ងាចថ្ងៃទី១៣ ខែធ្នូ ឆ្នាំ២០២២ ម្សិលមិញនេះ ។ បើតាមលោកអភិបាលខេត្ត ព្រឹត្តិការណ៍ពិព័រណ៍ម្ហូបអាហារខេត្តបាត់ដំបងនេះ រៀបចំធ្វើឡើងដើម្បីអបអរសាទរពិធីបុណ្យឆ្លងឆ្នាំសកលឆ្នាំ២០២២-២០២៣ ដែលព្រឹត្តិការណ៍នេះនឹងធ្វើការរៀបចំនៅថ្ងៃទី៣០-៣១ ខែធ្នូ ឆ្នាំ២០២២ ខាងមុខនេះ ។
សូមបញ្ជាក់ថា ក្រៅពីព្រឹត្តិការណ៍ពិព័រម្ហូបអាហារ នៅក្នុងការរៀបចំពិធីឆ្លងឆ្នាំ ២០២៣នេះផងទៀត រដ្ឋបាលខេត្តបាត់ដំបង គ្រោងរៀបចំឱ្យមានការដាក់តាំងពិព័រណ៍ផលិតផល ការសម្តែង សិល្បៈរបាំប្រពៃណី និងរបាំ ប្រជាប្រីយ នៃមន្ទីរវប្បធម៌ខេត្ត ការសម្តែងសៀក ការប្រគំតន្ត្រី ខ្នាតតូច-ធំ និងការអុជកាំ ជ្រួចឆ្លងឆ្នាំ នៅរាត្រីថ្ងៃទី៣១ ខែធ្នូ ឆ្នាំ២០២២ ដើម្បីអបអរសាទរការឈានចូលឆ្នាំថ្មី ឆ្នាំសាកល នារាត្រីថ្ងៃទី១ ខែមករា ឆ្នាំ២០២៣ ផងដែរ ។
លោកអភិបាលខេត្ត សុខ លូ នៅក្នុងកិច្ចប្រជុំ បានថ្លែងបញ្ជាក់ពីគោលបំណងសំខាន់នៃការរៀបចំព្រឹ ត្តិការណ៍ពិព័រម្ហូបអាហារនោះ គឺដើម្បីធ្វើការបង្ហាញនូវមុខម្ហូបខ្មែរដែលជាមុខម្ហូបអ្នកខេត្តបាត់ដំបង ឱ្យភ្ញៀវទេសចរណ៍ជាតិ និងអន្តរជាតិបានស្គាល់ និងបានភ្លក់នូវមុខខ្មែរជាច្រើនទៀតដែលសុទ្ធសឹងតែជាអាហារដ៏ឈ្ងុយឆ្ងាញ់របស់អ្នកខេត្តបាត់ដំបង ក៏ដូចជាម្ហូបអាហារខ្មែរដ៏ពេញនិយមសម្រាប់ប្រជាជនកម្ពុជា ។ គោលបំណងពិសេសមួយទៀត គឺដើម្បីទាក់ទាញភ្ញៀវទេសចរជាតិ និងអន្តរជាតិឱ្យមកទស្សនាកំសាន្ដនៅខេត្តបាត់ដំបងឱ្យកាន់តែច្រើនកុះករផងដែរ ។
នៅក្នុងកិច្ចប្រជុំនាម្សិលមិញនេះផងទៀត លោកអភិបាលខេត្តបានជំរុញដល់ស្ថាប័នមន្ទីរពាក់ព័ន្ធ ជាពិសេសមន្ទីរវប្បធម៌ និងមន្ទីរទេសចរណ៍ ត្រូវតែនាំយកនូវមុខម្ហូបខ្មែរដែលបាត់បង់ និងកំពុងតែមានការពេញនិយមល្បីៗនៅក្នុងខេត្ត ត្រូវយកមកដាក់តាំងបង្ហាញ ។ ត្រូវបំផុសអ្នកដែលមានថ្វីដៃក្នុងការចម្អិនមុខម្ហូបទាំងនោះ ដោយធ្វើការលើកទឹកចិត្តឲ្យពួកគេបានចូលរួម ដើម្បីយកមកបង្ហាញឱ្យភ្ញៀវទេសចរណ៍បានឃើញ បានដឹង បានស្គាល់ និងអាចភ្លក់រសជាតិម្ហូបខ្មែរ របស់អ្នកខេត្តបាត់ដំបង តាមរយៈពិព័រណ៍ម្ហូបនេះ។
ប្រធានមន្ទីរទេសចរណ៍ខេត្តបាត់ដំបង លោក អ៊ុចអ៊ុ ភិនីស្សារ៉ា បានថ្លែងថា នៅកម្ពុជាគឺមានមុខម្ហូបប្លែកៗទៅតាមតំបន់នីមួយៗ ហើយភាពសម្បូរបែប និងភាពច្នៃប្រឌិត និងថ្វីដៃនៃការចម្អិនម្ហូបអាហារឲ្យមានឱរសជាតិឆ្ងាញ់ ក៏សបញ្ជាក់ពីភាពស៊ីវិល័យ និងជាតឹកតាងដែលឆ្លុះបញ្ចាំងបង្ហាញនូវអត្តសញ្ញាណរបស់ប្រជាពលរដ្ឋដែលរស់នៅតាមតំបន់នីមួយៗក្នុងប្រទេសកម្ពុជាយើងផងដែរ៕
