កំពង់ឆ្នាំង ៖ សមាជិកនៃក្រុមប្រឹក្សាឃុំតាំងក្រសាំង នៃស្រុកទឹកផុស ខេត្តកំពង់ឆ្នាំង ម្នាក់ ត្រូវគេប្រទះឃើញស្លាប់ដោយមានខ្សែចំណងជាប់នឹងកនៅក្នុងផ្ទះរបស់គាត់ ក្នុងភូមិតាំងក្រសាំង ។ អាជ្ញាធរដាក់ការសន្និដ្ឋានថា លោក ជៀម សារ៉េត អាយុ៧២ឆ្នាំ បានធ្វើអត្តឃាតខ្លួនដោយ សារតែមានវិបត្តិផ្លូវចិត្ត ពាក់ព័ន្ធនឹងករណីជំពាក់លុយគេច្រើនពេក។ សាកសពរបស់គាត់ដែលមានខ្សែនីឡុងពណ៌ក្រហម ចងកជាប់នឹងដែកធ្នឹម ក្នុងតៀមលក់ដូរមុខផ្ទះ ដែលជាកន្លែងគាត់តែងសម្រាកនោះ ត្រូវបានក្រុមគ្រួសារប្រទះឃើញវេលាម៉ោង ៤ទាបភ្លឺ ថ្ងៃទី១០ មីនា ឆ្នាំ២០២៣ ក្នុងពេលដែលចុះមកបើកតៀមលក់ដូរ ។ អធិការនគរបាលស្រុកទឹកផុសលោកវរសេនីយ៍ឯក ខែម វិបុល បានថ្លែងថា នៅប៉ុន្មានថ្ងៃ មុនពេលដែលមានហេតុការណ៍នេះ បុរសអាយុ ៧២ឆ្នាំនោះ គាត់បានយកម៉ូតូរបស់កូនទៅលក់ ប៉ុន្តែបានប្រាប់កូនគាត់ថា ម៉ូតូបានបាត់ ។ បុរសចំណាស់នោះ ត្រូវគេនិយាយថា បានដើរខ្ចីលុយពីអ្នកភូមិជាច្រើននាក់ប៉ុន្តែគេមិនឱ្យខ្ចី ដែលករណីនោះ បាននាំឱ្យមានការសន្និដ្ឋានថា គាត់មានវិបត្តិផ្លូវចិត្តដោយ សារជំពាក់លុយគេច្រើនពេក ៕
