កំពង់ឆ្នាំង ៖ ទីលានបាញ់គ្រប់ពិតយោធភូមិភាគពិសេស ដែលស្ថិតនៅខេត្តកំពង់ឆ្នាំង ត្រូវបានសាងសង់បាន ៩០%ហើយ ក្រោយការចាប់ផ្តើមសាងសង់តាំងពីចុងឆ្នាំ២០២២នោះមក ។ មេបញ្ជាការស្ដីទីយោធភូមិភាគពិសេស លោក ឧត្តមសេនីយ៍ទោ ប៉ូ វណ្ណះ ក្នុងដំណើរត្រួតពិនិត្យទីលានបាញ់គ្រាប់ពិត យុទ្ឋវិធី និងយុទ្ឋដំណើររបស់យោធភូមិភាគពិសេស នៅតំបន់អភិវឌ្ឍន៍ ភូមិភាគពិសេស ព្រែកជីក នៅព្រឹកថ្ងៃទី២១ ខែកុម្ភៈ ឆ្នាំ២០២៣នេះ លោកបានថ្លែងនូវកោតសរសើរដល់កិច្ចខិតខំប្រឹងប្រែងរបស់បណ្តាអង្គភាព ដែលបានខិតខំកសាងទីលានបាញ់គ្រាប់ពិត ដែលបានកសាងតំបន់អភិវឌ្ឍន៍ភូមិភាគពិសេសនេះឡើង ។ លោកបានឲ្យដឹងថា ទីលានបាញ់គ្រាប់ពិតដែលកំពុងសាងសងនេះ ត្រូវបានចាប់ផ្តើមសាងសង់នៅចុងឆ្នាំ២០២២ នឹងគ្រោងធ្វើឲ្យរួចរាល់នៅឆមាសទី១ ឆ្នាំ២០២៣ ដែលសាងសង់លើផ្ទៃដី៣ហិចតា ក្រោមជំនួយឧបត្ថមបីសប្បុរសជន ។ ទីលានបាញ់គ្រប់ពិតយោធភូមិភាគពិសេសនេះ មានទីតាំងនៅចំ ណុចព្រែកជីក ស្ថិតក្នុងភូមិចំបក់ប្រាសាទ ឃុំក្រាំងស្គាស្រុកផុស ខេត្តកំពង់ឆ្នាំង ។
លោក ឧត្តមសេនីយ៍ទោ ប៉ូ វណ្ណ: បានថ្លែងថា បើទោះបីជាកិច្ចខិតខំប្រឹងប្រែងមិនទាន់បានសម្រេច ១០០% ក៏ដោយសារតែកត្តាធម្មជាតិ ដែលមានភ្លៀងធ្លាក់ច្រើនកាលពីខែមុនក្តី ក៍ប៉ុន្តែដើម្បីសម្រេចតាមទិសដៅផែនការរបស់យោធភូមិភាគពិសេសបានដាក់ចុះ សូមតាមបណ្តាអង្គភាពនីមួយៗ ត្រូវអនុវត្តផែនការកសាងទីលានបាញ់គ្រាប់ពិតបន្តទៀត ។
បើតាមការឲ្យដឹងពីលោក មេបញ្ជាការស្ដីទីយោធភូមិភាគពិសេស ចំពោះការងារដែលត្រូវបញ្ចប់ដែលនៅសេសសល់ ១០% ទៀតនោះរួមមាន ដូចជា វេទិកាសម្រាប់ទទួលភ្ញៀវកិត្តិយសគណៈអធិបតីដែលបានចូលរួម, ការដាំបង្គោលរបង, ដាក់គ្រឿងចក្រត្រាស់សេរទីលានបាញ់គ្រាប់ពិត ដែលធ្វើយ៉ាងណាឲ្យបានរៀបស្មើ នឹងការរៀបចំដាក់កង់ឡានច្រកដីជាដើម ។ ដោយឡែកផែនការបន្ថែម គឺការជីកប្រឡាយសម្រាប់បង្ហូរទឹក និងការកសាងផ្លូវចូលទីលានបាញ់គ្រាប់ពិត។
លោកឧត្តមសេនីយ៍ទោ បានជំរុញឲ្យអង្គភាពតំបន់អភិវឌ្ឍន៍ភូមិភាគពិសេស ត្រូវជំរុញការកសាងក្លោងទ្វារចូលឲ្យបានឆាប់រហ័ស និងទាន់ពេលវេលា និងត្រូវធ្វើឱ្យតំបន់អភិវឌ្ឍន៍ភូមិភាគពិសេស ក្លាយជាតំបន់មានពណ៌បៃតងស្រស់ សក្តិសមជាតំបន់មានការអភិវឌ្ឍន៍ខ្ពស់ ។ ជាចុងក្រោយ លោកឧត្តមសេនីយ៍ទោ ប៉ូ វណ្ណៈ ក៏បានផ្ដាំផ្ញើដល់គ្រប់បណ្តាអង្គភាពត្រូវសរសេរគម្រោងផែនការក្នុងថ្ងៃដែលនឹងដាក់សម្ពោធឱ្យប្រើប្រាស់ជាផ្លូវការតំបន់អភិវឌ្ឍន៍យោធភូមិភាគពិសេស និងទីលានបាញ់គ្រាប់ពិតក្នុងពេលខាងមុខផងដែរ ៕
