ភ្នំពេញ ៖ ឈុតតំណាងជាតិរបស់បវរកញ្ញាកម្ពុជា បានជាប់ជាឈុតតំណាងជាតិល្អជាងគេ Best National Costume ក្នុងកម្មវិធីប្រកួតសម្រស់បរវរកញ្ញាភពផែនដី Miss Planet International ២០២៣ ក្នុងចំណោមបវរកញ្ញា មកពី១៤ប្រទេសផ្សេងទៀតនៅលើពិភពលោក ។ ការប្រកួតផ្តាច់ព្រ័ត្រ Miss Planet International 2023 បានប្រព្រឹត្តទៅនារាត្រីថ្ងៃទី២៩ ខែមករា ឆ្នាំ២០២៣ ម្សិលមិញ ក្រោមអធិបតីភាពរដ្ឋលេខាធិការក្រសួងទេសចរណ៍ លោក ប៉ាក់ សុខុម ព្រមទាំងសិល្បករសិល្បការិនីជាច្រើនរូប ។
ឈុត រាហូចាប់ចន្ទ ជាឈុតតំណាងជាតិ ដែលកម្ពុជាបានរៀបចំសំម្រាប់បវរកញ្ញាកម្ពុជា កញ្ញា ពក ស្រីល័ក្ខ គ្រងក្នុងការបង្ហាញក្នុងកម្មវិធីនោះ ។ បើយោងតាមអ្នករៀបចំ ការរចនាឈុត រាហូចាប់ចន្ទ សម្រាប់ការប្រកួតក្នុងកម្មវិធីសម្រស់បរវរកញ្ញាភពផែនដី Miss Planet International ២០២៣ គឺដើម្បីបង្ហាញពីវប្បធម៌-អរិយធម៌ និងជំនឿសាសនាដ៏ផូរផង់នៃកម្ពុជា។ បវរកញ្ញាកម្ពុជា កញ្ញា ពក ស្រីល័ក្ខ បើទោះបីឈុតនោះ មានទំហំធំ និងជួបឧបសគ្គពេលបង្ហាញលើឆាកប្រកួតយ៉ាងណា ប៉ុន្តែបវរកញ្ញារូបនេះ បានគ្រប់គ្រងស្ថានការបានយ៉ាងល្អ ។ ក្រៅពីការគ្រងនៅលើឆាកប្រកួត ឈុតតំណាងជាតិកម្ពុជានេះផងទៀត ក៏ត្រូវបានកម្មវិធីតម្រូវឲ្យស្លៀកថតនៅប្រាសាទអង្គរវត្ត ដែលរឹតតែទទួលបានការចាប់អារម្មណ៍យ៉ាងខ្លាំងពីសំណាក់មហាជន ។
សូមបញ្ជាក់ថា មុនការប្រកួតស្វែងរកម្ចាស់មកុដសម្រស់បរវរកញ្ញាភពផែនដី Miss Planet International ២០២៣ នេះ អ្នករៀបចំកម្មវិធីក៏បានរៀបចំឲ្យមានដំណើរកំសាន្តសម្រាប់បវរកញ្ញាដែលមកពី ១៤ប្រទេសនោះ បានដើរកម្សាន្តនៅលើទឹកដីអង្គរនៃខេត្តសៀមរាប ដើម្បីឲ្យពួកគេបានទស្សនាស្វែងយល់ពីប្រាសាទនានា និងស្លៀកឈុតប្រពៃណីខ្មែរផងដែរ ជាពិ សេសក៏មានកម្មវិធីអាហារពេលល្ងាចសប្បុរសធម៌ ដើម្បីផ្តល់ជំនួយដល់មន្ទីរពេទ្យកុមារអង្គរ ផងដែរ ។ នៅជាមួយគ្នានោះ បវរកញ្ញាទាំង១៤រូប តម្រូវឲ្យគ្រងនូវឈុតវប្បធម៌ និងឈុតតំណាងជាតិនៃប្រទេសរៀងៗខ្លួន នៅប្រាសាទអង្គរវត្តផងដែរ ។
ការប្រកួតស្វែងរកម្ចាស់មកុដសម្រស់បរវរកញ្ញាភពផែនដី Miss Planet International ឆ្នាំ២០២៣ បវរកញ្ញាកម្ពុជាបានជាប់លំដាប់រងទី៧ និងឈ្នះក្នុងវគ្គប្រកួតឈុតតំណាងជាតិ ។ បវរកញ្ញាដែលឈ្នះមកុដជា Miss Planet International ឆ្នាំ២០២៣ គឺបានទៅលើបវរកញ្ញា ដែលមកពីប្រទេស ហ្វីលីពីន ។ បើតាមការឲ្យដឹងពីអ្នករៀបចំកម្មវិធី ការប្រកួត Miss Planet International ឆ្នាំ២០២៤ នឹងធ្វើការរៀបចំម្តងទៀតនៅក្នុងខែតុលា ឆ្នាំ២០២៣ ខាងមុខនេះ ។ តាមរយៈកម្មវិធីប្រកួតសម្រស់ដែលរៀបចំឡើងនៅកម្ពុជានេះ ជាឱកាសផ្សព្វផ្សាយដល់បណ្តាប្រទេសផ្សេងៗជាច្រើនទៀតពីទេសចរណ៍វប្បធម៌កម្ពុជា៕
