បាត់ដំបង ៖ សហគមន៍អេកូទេសចរណ៍ព្រែកទាល់ ជាតំបន់ជីវចម្រុះមួយក្នុងចំណោមបីរបស់បឹងទន្លេ សាប ។ ព្រែកទាល់ គឺជាជម្រកសត្វស្លាបដ៏ធំ និងគួរឲ្យទាក់ទាញ បានក្លាយទៅជាតំបន់មួយដែលទទួលបានភ្ងៀវទេសចរជាច្រើនរៀងរាល់ឆ្នាំ ។ សហគមន៍អេកូទេសចរណ៍ព្រែកទាល់នេះ មានទីតាំងស្ថិតនៅក្នុងភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង មានចម្ងាយប្រមាណ ១០០គីឡូម៉ែត្រ ពីក្រុងបាត់ដំបង ដោយធ្វើដំណើរតាមកាណូត ។ សក្តានុពលនៅសហគមន៍រួមមាន ៖ សត្វស្លាបចម្រុះ ទេស ភាពបឹងទន្លេសាប ទេសភាពព្រៃលិចទឹក ភូមិអណ្តែតទឹក សហគមន៍នេសាទ សិប្បកម្មកែច្នៃកំប្លោក នោះជាដើម ។ តំបន់ព្រែកទាល់ផងដែរ ក៏មានព្រៃភក់លិចទឹកតាមរដូវដែលមានជីវសាស្ត្រចម្រុះជាច្រើន និងទស្សនីយភាពនៅជុំវិញតំបន់សំខាន់នេះ គឺមានភូមិអ្នកនេសាទមួយចំនួន មានពលរដ្ឋ១,២០០គ្រួសារ រស់នៅក្នុងផ្ទះបណ្ដែតទឹកលើក្បូនឫស្សី ឬផ្ទះទឹក ដែលផ្លាស់ប្ដូរទៅតាមការឡើង និងស្រកនៃផ្ទៃទឹកបឹង ។
សេវាកម្មនៅសមាគមន៍រួមមាន សេវាម្ហូបអាហារ និងភេសជ្ជៈ អ្នកនាំភ្ញៀវសេវាដឹកភ្ញៀវតាមទូក សេវាផ្ទះស្នាក់ និងកន្លែងលក់វត្ថុអនុស្សាវរីយ៍ ។ យោងតាមគេហទំព័រ Visitcambodia ព្រែកទាល់ គឺជាកន្លែងមួយ ដែលប្រមូលផ្ដុំនូវសត្វស្លាបដ៏កម្រជាច្រើនប្រភេទមករស់នៅយ៉ាងច្រើនសម្បើម និងបង្កើតជាសំបុករស់នៅដ៏គួរឲ្យចង់ទស្សនា ។ នៅរវាងពីខែធ្នូ ដល់ខែកុម្ភៈ ភ្ងៀវទេសចរនឹងបានឃើញការប្រមូលផ្ដុំដ៏អស្ចារ្យរបស់សត្វបក្សីនានា ដែលមានដូចជា សត្វទុង ក្រសា និងសត្វបក្សីផ្សេងៗដែលជិតផុតពូជជាច្រើនប្រភេទទៀតផងដែរ។ នៅពេលដែលទឹកនាតំបន់ផ្សេងចាប់ផ្ដើមស្រក សត្វបក្សីមកពីគ្រប់ទិសទីបានមកជួបជុំគ្នានៅទីនេះ។ គេហទំព័រ Visitcambodia បានឲ្យដឹងទៀតថា បក្សីទាំងនោះបានបន្តរស់នៅក្នុងតំបន់នេះរហូតដល់ចុងខែ កុម្ភៈ ប៉ុន្តែទឹកមិនសូវជាច្រើនដូចពេលមុនប៉ុន្មាននោះទេ។ ភ្ញៀវទេសចរក៏អាចឃើញមានសត្វទាំងនេះផងដែរនៅក្នុងអំឡុងខែ កញ្ញា ប៉ុន្តែមិនសូវមានចំនួនច្រើនប៉ុន្មាននោះទេ ។ បើតាមអ្នកជំនាញបានបញ្ជាក់ថា ពេលវេលាដែលល្អបំផុតសម្រាប់ការទស្សនាសត្វនៅទីនេះ គឺពេលព្រឹកព្រលឹម និងពេលរសៀល។ ដូច្នេះបើភ្ញៀវទេសចរចង់ទស្សនាទិដ្ឋភាពដ៏អស្ចារ្យរបស់សត្វស្លាបទាំងនេះ អ្នកត្រូវតែចំណាយពេលមួយយប់ ក្នុងការស្នាក់នៅក្នុងតំបន់ព្រែកទាល់។
សម្រាប់ការចំណាយរបស់អ្នកនៅតំបន់ទេសចរណ៍ព្រែកទាល់ គឺមានន័យថា លោកអ្នកបានចូលរួមចំ ណែកនៅក្នុងការជួយលើវិស័យអប់រំនៅតំបន់នោះផងដែរ៕
