ភ្នំពេញ ៖ រាជរដ្ឋាភិបាលបាននឹងរៀបចំបោះឆ្នោតជ្រើសរើសមន្ត្រីដឹកនាំក្រុង និងស្រុកដែលទើបបង្កើតថ្មីចំនួន៥ នៅប្រមាណ៤ខែ ខាងមុខទៀតនេះ ។ ក្រុង និងស្រុកទាំង៥ ដែលរាជរដ្ឋាភិបាលទើបបានប្រកាសបង្កើតក្រុងថ្មី គឺរួមមានក្រុង អរិយក្សត្រ, ក្រុងសំពៅពូន ដែលស្ថិតក្នុងខេត្តកណ្តាល, ក្រុងឧដុង្គម៉ែជ័យ និងស្រុកសាមគ្គីមុនីជ័យក្នុងខេត្តកំពង់ស្ពឺ និងស្រុកអូរគ្រៀងសែនជ័យ ក្នុងខេត្តក្រចេះ។ យោងតាមអនុក្រិត្យ ក្រុងអរិយក្សត្រ នឹងត្រូវមានសមាជិកក្រុមប្រឹក្សាចំនួន១៩នាក់, ក្រុងសំពៅពូន នឹងត្រូវមានសមាជិកក្រុមប្រឹក្សាចំនួន ១៩នាក់, ក្រុងឧដុង្គម៉ែជ័យ នឹងត្រូវមានចំនួន ១៧នាក់, ស្រុកសាមគ្គីមុនីជ័យ នឹងត្រូវមាន ១៩នាក់, ចំណែកស្រុកអូរគ្រៀងសែនជ័យ នឹងត្រូវមានចំនួន ១៥នាក់ ។ យោងតាមលិខិត២ផ្សេងគ្នា គឺសេចក្តីសម្រេចរបស់រាជរដ្ឋាភិបាល និងសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត បានឲ្យដឹងថា គេបានកំណត់យកថ្ងៃទី៩ ខែមេសា ឆ្នាំ២០២៣ ជាកាលបរិច្ឆេទនៃការបោះឆ្នោតលើកទី១ ដើម្បីធ្វើការជ្រើសរើសក្រុមប្រឹក្សាក្រុងនិងស្រុកទាំង៥នោះ ។
