កោះកុង ៖ ការសាងសង់ស្តូបឈ្នះ ឈ្នះ ក្នុងខេត្តកោះកុង សម្រេចបានលទ្ធផល ៨៥%នៃផែនការហើយ គិតរហូតមកទល់ពេលនេះ ។ យោងតាមផេកហ្វេសប៊ុកផ្លូវការរបស់ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានឲ្យដឹងនៅថ្ងៃទី១៦ ខែធ្នូ ឆ្នាំ ២០២២ នេះថា ស្តូបឈ្នះ ឈ្នះ ក្នុងខេត្តកោះកុងនេះ គ្រោងនឹងបញ្ចប់ការសាងសង់តួស្តូបឈ្នះ ឈ្នះ នៅបំណាច់ខែមេសា ឆ្នាំ២០២៣ ខាងមុខ ។
ស្តូបឈ្នះ ឈ្នះ ក្នុងខេត្តកោះកុងនេះ សាងសង់ឡើងក្នុងគោលបំណង ដើម្បីរំលឹកគុណដល់វីរបុរសជំនាន់មុនៗ ដែលបានលះបង់អាយុជីវិត ដើម្បីបូរណភាពទឹកដី ការពារមាតុភូមិប្រទេសជាតិ ក្នុងសម័យភ្លើងសង្រ្គាម។ ស្តូប ឈ្នះ ឈ្នះ នៃខេត្តកោះកុងនេះផងទៀត មានទីតាំងស្ថិតនៅទល់មុខអាស្រមលោកយាយម៉ៅ ក្នុងភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ តាមបណ្តោយផ្លូវជាតិលេខ៤៨ ។ ស្តូបឈ្នះ ឈ្នះ បានសាងសង់ឡើងតាមគំរូប្លង់គោល មានឃឿន៤ជ្រុង សរុប៦៦ម៉ែត្រ កម្ពស់៤៣ម៉ែត្រ ។ ទីធ្លាបរិវេណ មានទំហំធំទូលាយ ក្នុងការចតរថយន្ត និងការទេសចរណ៍កំសាន្តរបស់ពលរដ្ឋ។
ស្តូបឈ្នះ ឈ្នះ ក្នុងខេត្តកោះកុងនោះ បានធ្វើពិធីបញ្ចុះបឋមសិលា សាងសង់ កាលពីថ្ងៃទី៣០ ឧសភា ឆ្នាំ២០២០ ក្រោមការអញ្ជើញជាអធិបតីដោយ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។ បើតាមការឲ្យដឹងពីសម្តេចពិជ័យ ស្តូបវិមាននយោបាយឈ្នះ ឈ្នះនេះ សាងសង់ឡើង ក្រោមការឧបត្ថម្ភពីសប្បុរសជននានា៕
