ភ្នំពេញ ៖ រដ្ឋមន្ត្រី ក្រសួងវប្បធម៌ និងវិចិត្រសិល្បៈ បានបង្ហាញការសោកស្តាយចំពោះករណីវាយកុដិបុរាណ អាយុជិត ១០០ឆ្នាំក្នុងវត្តឧណ្ណាលោម ដើម្បីយកទីតាំងសង់ព្រះចេតិយថ្មី ។ យោងតាមលិខិតទួលថ្វាយមួយរបស់ក្រសួងវប្បធម៌ និងវិចិត្រសិល្បះ ដែលចុះហត្ថលេខាដោយរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកជំទាវសភាចារ្យបណ្ឌិត ភឿង សកុណា ដែលបណ្តាញសារព័ត៌មានទើបទទួលបាននៅថ្ងៃទី១២ ធ្នូ ២០២២នេះ ដែលសរសេរការបង្ហាញការសោយស្តាយពីសំណាក់លោកស្រីរដ្ឋមន្ត្រីផ្ទាល់ថា « ទូលព្រះបង្គុំសូមគោរពទូលថ្វាយ សម្តេព្រះមហាសង្ឃរាជាធិបតី កិត្តិឧទ្ទេសបណ្ឌិត មេត្តាជ្រាបដ៏ខ្ពង់ខ្ពស់ថា៖ កាលពីថ្ងៃទី៧ ខែធ្នូ ឆ្នាំ២០២២កន្លងមក ទូលព្រះបង្គុំ បានទទួលដំណឹងពីមន្ត្រីជំនាញ និងមហាជនរាយការណ៍មក ស្តីពីករណីនៃការវាយកម្ទេចកុដិបុរាណចំនួន៣ (កុដ្ឋលេខ៤៣, ៤៤ និង៤៥ ) ដែលបានកសាងនាកំឡុងឆ្នាំ១៩៣០ នៅក្នុងបរិវេណវត្តឧណ្ណាឡោម ដើម្បីព្រះចេតិយ »។ បើតាមលិខិតរបស់ក្រសួងវប្បធម៌ដដែល កុដិទាំបីនេះ ក្រសួងបានចាត់ទុកជាសម្បត្តិបេតិកភណ្ឌជាតិ ដោយបានចុះបញ្ជីរបស់មន្ទីរវប្បធម៌ និងវិចិត្រសិល្បៈ រាជធានីភ្នំពេញ កាលពីឆ្នាំ២០១៧ ។
ក្នុងលិខិតដដែលបានឲ្យដឹងទៀតថា សកម្មភាពនៃការរុះរះកុដ្ឋនេះ កំពុងរងការរិះគន់យ៉ាងផុសផុលពីមហាជនតាមរយៈបណ្តាយសង្គម ។ ក្រសួងវប្បធម៌ និងវិចិត្រសិល្បៈ ថែមទាំងបានបញ្ជាក់ទៀតថា សកម្មភាពនៃការរុះរើ និងវាយកម្ទេចកុដិចាស់ដោយពុំបានសិក្សាពិគ្រោះ និងការអនុញ្ញាតពីក្រសួងវប្បធម៌ និងវិចិត្រសិល្បៈនេះ ជាទង្វើដែលផ្ទុយនឹងច្បាប់ ព្រមទាំងសារាចររបស់រាជរដ្ឋាភិបាលដែលជាឯកសារគតិយុត្តិជាធរមាន ដែលរាល់ការជួសជុលព្រះវិហារ ឬសំណង់អគារបេតិកភណ្ឌនានាត្រូវស្នើសុំការអនុញ្ញាតពីក្រសួងវប្បធម៌ និងវិចិត្រសិល្បៈ ដែលជាក្រសួងជំនាញ ។
មិនមានសេចក្តីរាយការណ៍ថា តើចេតិយថ្មីដែលមានគំរោងនៅលើទីតាំងកុដ្ឋចាស់នោះ ជារបស់បុគ្គលរូបណាឡើយ ប៉ុន្តែក្រសួងវប្បធម៌ និងវិចិត្រសិល្បៈ បានទូលថ្វាយសម្តេចព្រះមហាសង្ឃរាជាគណៈមហានិកាយ នៃព្រះរាជាណាក្រកម្ពុជា សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ព្រះរាជមេត្តាបញ្ឈប់ការរុះរើ វាយកម្ទេចអគារនៃកុដ្ឋបុណនេះ ដោយសេចក្តីអនុគ្រោះដ៏ខ្ពង់ខ្ពស់បំផុត ៕
