ព្រះសីហនុ ៖ សាលាជាតិវិជ្ជាជីវៈទេសចរណ៍ បានបើកការដា្ឋនសាងសងហើយនៅថ្ងៃទី៩ ខែធ្នូ ឆ្នាំ២០២២ ក្រោមអធិបតីភាព រដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន និងអភិបាលខេត្តព្រះសីហនុ គួច ចំរើន ។ បើតាមរដ្ឋមន្ត្រីក្រសួងទេសចរណ៍ លោកបណ្ឌិត ថោង ខុន សាលាជាតិវិជ្ជាជីវៈទេសចរណ៍នេះ មានទីតាំងស្ថិតនៅអគារលេខ១ ផ្លូវលេខ១០៩ កែងផ្លូវលេខ១១០ ស្ថិតនៅភូមិ២ សង្កាត់លេខ២ ក្រុងព្រះសីហនុ ខេត្តព្រះសីហនុ។
នៅក្នុងពិធីបើកការដ្ឋានសាងសងនាព្រឹកមិញនេះ លោករដ្ឋមន្ត្រីក្រសួងទេសចរណ៍ បានថ្លែងថា ដោយទទួលបានការអនុញ្ញាតពីរាជរដ្ឋាភិបាលកម្ពុជា ក្រសួងទេសចរណ៍រៀបចំពិធីក្រុងពាលីបួងសួងសុំបើកការដ្ឋានសាងសង់សាលាជាតិវិជ្ជាជីវៈទេសចរណ៍ ដោយធ្វើការរុះរើអគារចាស់ នៃមន្ទីរទេសចរណ៍បច្ចុប្បន្នខេត្តព្រះសីហនុងបច្ចុប្បន្ន ។
យោងតាមគម្រោងសាងសង់សាលាជាតិវិជ្ជាជីវៈទេសចរណ៍ខេត្តព្រះសីហនុ នឹងសាងសង់រយៈពេល ១៥ខែ ដែលចាប់ផ្តើមពីខែធ្នូ ឆ្នាំ២០២២ និងបញ្ចប់ការងារសាងសង់នៅខែមិនា ឆ្នាំ២០២៤ ដោយក្រុមហ៊ុនសាងសង់ អឹបេន ខេមបូ ប៊ីលឌើរ ឯ.ក URBAN CAMBO BUILDERS Co,LTD ។
នៅក្នុងពិធីសាសនានាព្រឹកមិញនេះ បានរៀបចំគ្រឿងសក្ការៈថ្វាយដល់ព្រះបារមីព្រះម៉ែធរណី ព្រះម៉ែគង្គា ព្រះបារមីគ្រប់ព្រះអង្គ ដែលថែរក្សាព្រះរាជាណាចក្រកម្ពុជា ព្រះបារមីគ្រប់ព្រះអង្គដែលថែរក្សាដែនសមុទ្រ និងតំបន់ឆ្នេរ ព្រះបារមីព្រះនាងក្រេបសមុទ្រ ជាព្រះរាជបុត្រីព្រះឥន្ទ្រាធិរាជ ដែលទូលព្រះបង្គំសុំថ្វាយនៅទីនេះ នូវទង់ឃ្វាលា ៧ពណ៏ ចំនួន ២១ទង់ ជាតំណាងកងទ័ពរាប់ម៉ឺនលាននាក់ របស់ព្រះនាង។ ព្រះបារមីលោកជំទាវម៉ៅ ហៅលោក យាយម៉ៅ ព្រះបារមីថែរក្សាខេត្តព្រះសីហនុ ម្ចាស់ទឹក ម្ចាស់ដី ម្ចាស់ព្រៃព្រឹក្សា ព្រះវិញ្ញាណខ័ន្ធបុព្វបុរសថែរក្សាព្រះរាជាណាចក្រកម្ពុជា បារមីគ្រប់ព្រះអង្គដែលគង់ប្រថាប់ នៅមហាប្រាង្គប្រាសាទ បារមី និងព្រះបារមីគ្រប់ព្រះអង្គ ដែលទូលព្រះបង្គំបានថ្វាយ សូមស្តេចទ្រង់យាងគង់ប្រថាប់នៅទីអាសនៈ ដែលបានរៀបចំថ្វាយនៅទីនេះរួចហើយ សូមយាង និងសូមអញ្ជើញ។
ក្នុងឱកាសក្រុងពាលីបួងសួងដ៏មហាប្រសើរនេះ សូមឱ្យមន្ត្រីគ្រប់ជាន់ថ្នាក់ នៃសាលាខេត្តព្រះសីហនុ រួមទាំងប្រជាពលរដ្ឋទូទាំងប្រទេស សូមទទួលបានសេចក្ដីសុខចម្រើន បរិបូរណ៍ ចៀសផុតពីជម្ងឺកាចសាហាវទាំងពួង និងគ្រោះធម្មជាតិនានា ព្រមទាំងសូមជួយឱ្យការរៀបចំពិធីបើកការដ្ឋានសាងសង់ និងការសាងសង់សាលាជាតិវិជ្ជាជីវៈទេសចរណ៍ខេត្តព្រះសីហនុប្រកបដោយភាពរលូន និងទទួលបានជោគជ័យដ៏ធំធេង សូមកុំឱ្យមានគ្រោះថ្នាក់ដល់កម្មករ បុគ្គលិកសំណង់នៅពេលសាងសង់ ហើយសូមឱ្យកិច្ចដំណើរការសាងសង់សាលាជាតិវិជ្ជាជីវៈទេសចរណ៍ខេត្តព្រះសីហនុ ប្រកបដោយភាពរលូន និងទទួលបានជោគជ័យក្នុងការបណ្តុះបណ្តាលធនធានមនុស្ស ដើម្បីអភិវឌ្ឍន៍វិស័យទេសចរណ៍ នៃព្រះរាជាណាចក្រកម្ពុជាឱ្យកាន់តែរីកចំរើនថែមទៀត ៕
